← Back to Canada Without Shadows sound installation
Suno 1, Suno 2
Suno 1
Ande mrni Romani Mahala sem.
O drom Dajanli Osmanbega pe Gorica.
Bahtali sem.
Pasha mande bihuladine chava.
Mahalake, bihuladine, bahtale, Romane chava.
Savore pasha mande.
Bahtali sem.
Hi-man but kotorvale bombone.
Melale cikne vasta roden len.
Tate, kale jakha mangen len.
Shukar, lole muja halen len.
Savore Roma san kote ande Mahala.
Khonik na cherel buchi.
Sar sajekh.
Sa opash si shukar.
Phiraven kotorvale Romnjake dimije the
Phure kotorvale Romane gada.
Prasten pharade, prnange Romane chava.
Tate Romane ila.
Opash shulavdimata.
Opash chororipe.
Melalo, praxalo, chororo, kotorvalo, the bahtalo.
But Roma beshen tele pe phuvjate
Phenden thaj xasajven.
Andaro sako cher ashunav aver Romani muzika.
Krlalo si.
Kahche kasetofono si majzuralo?
Xasajvav.
Cheja chelen.
Chava diklen.
Phure pijen kafava thaj beshen avri tele pasha udareste.
Romano chejfo.
Pasha Shechosko cher beshen desh Roma.
Beshen tele ande bari rota.
So cheren?
Avav pashe the dikhav bari tepsija mashkare len.
Ande tepsija peklo mas the peklo Romano marno.
Romano marno e vastenca chinden,
Lolo paradajzo halen.
Jagali rachija pijen.
Jekhethane.
Chacho Romano.
Von dikhen man, von akharen man.
Besh kate, phen! Ha manca!
Me beshav thaj hav.
Jekhethane lenca.
Bahtali sem.
Suno 2
Dzav chere.
Putardo udar.
Dikhav andre.
Chucho cher.
Daje! Dade!
Khonik na irisarel.
Phenjalen! Phrala!
Khonik na irisarel.
Putardo amaro udar?!
Shaj ka avel von beshen e kakonsa.
Dzav te dikhav.
Naj san kote. Nane mi familija.
Dzav pale ando mrno cher.
Andre sem. Beshav.
Cherav kafava pala pes.
Dikhav kaj sa si sar sasa:
Zumi ande chiradija,
Peklo mas ande bari tepsija
Salata thaj marno pe sinija.
Hav dejaki zumi.
Avri sem.
O kham zuralo tatarel.
Ali naj len Roma ande Mahala.
Phiravav krzo Mahala koring Turbe.
Shaj te avel von beshen kote.
Mukhav e chera kaj dzuvden: Alija, Latifa the Husica,
phuri Nura the Selma.
Dikhav prdal pe kaj mangav te dikhav phure Meho the Safija.
Lesko fijakero si avri pasho cher.
Andaro sulundaro del o thuv.
Von chiraven hape pala chavoreske chavoren.
Sar sajekh.
Ali naj len Roma ande Mahala.
Phiravav.
Pe mrno stingo rig san but garazhurje,
Opre phure vordoneske kotora the phuro sastro.
Chesmava anadari savi o paj biachado del thav.
Phiravav polohko mangav lungo te dikhav sako shej,
sako cher ande Mahala.
Me jakha dzan pale pe chacho rig.
Mukhav o cher kaj beshile Bajro the Grozda.
Akana kote beshel o Refiko e familijenca, Kosovako Rom.
E Roma paruven ande Mahala.
Phiravav the dikhav cikni cher kaj trajen phure Zejfa the Muste,
phen the phral save nikana na maritimen.
Von dzanen te chingaren the akushen sar khonik.
Po majlacho.
Ali naj len Roma ande Mahala.
Mashkare si o dromorro savo anel tut dziko cikno cher.
Kote beshen Bajro Pujpica the Ljubica,
Ema the Ramo Mrvica, Chelo Tahirovic.
Phiravav durder.
Kote si o cher kaj beshel Baja Tahirovic, pasha si Mejra the Tale,
Hajra the Bugar Sejdic, Raba the Ramiz Beshic,
o cher kaj beshel familija Hasanovic.
Ali naj len Roma ande Mahala.
Chuchi Mahala.
Phiravav.
Rovav.
Akana dikhav Turbe.
Nane dadesko vordon.
Nakhalav o cher kaj trajen Iso the Hajra.
Phiravav durder thaj tele talo dromeste si baraka kaj trajen
Kaja thaj Pasho, Musa thaj Cina, Tuna thaj Trajan e familijenca.
Opash baraka si shulavdimata:
phure, melale the pharade cohe the gada,
melale the pharade kundure, hape the papirja.
A naj len Roma ande Mahala.
Dzav dromenca the dikhav cahra.
Pharadi cahra.
Chorori cahra.
Pandz chavoren soven kote.
Romni Kaja beshel kote.
Laki jag si dzuvdi.
Pe jagate dzezva,
Ande dzezva kali kafava.
Kaja chumidel man.
Beshav te pijav kafava.
Mangav te phuchav pala mrni familija.
Daravipe chinel mrni vorba.
Sastrune chirikle!!!.
Izdrav e daravipestar.
Chavoren the Kaja nashaven.
Granaturja, bombe!!!
Sar o bar sem.
Nashti te nashavav e daravipestar.
Kaj si mrni familija?
Granaturja, bombe!!!
Vazdav ando parno themeste…….